Корпус Лоика Шерали
1941 - 2000

* * *

Бо худи худ ҳам қарибам, ҳам рақиб,
Худфиребам, худфиребам, худфиреб!

То зи худ бегона, бо бегона хеш,
Пурниҳебам, пурниҳебам, пурниҳеб!

То фарози осмон гар рафтаам,
Сарнишебам, сарнишебам, сарнишеб!

Ҷо надорам дар ҷаҳони бекарон,
Ман ғарибам, ман ғарибам, ман ғариб!

Ганҷи дунё хурданам буд орзу,
Бенасибам, бенасибам, бенасиб!

Аз шикебоӣ надидам суду боз
Ношикебам, ношикебам, ношикеб.

Бо дилам кай худҳисобӣ кардаам?!
Беҳисебам, беҳисебам, беҳисеб!...