|
* * * Чархи гарданда, ки гирди сари мо мегардад,
Душмани мост, вале дӯстнамо мегардад.
Дилсафедон ҳама ҷо рӯзи сиёҳе доранд,
Дар паси абр рухи моҳ сиё мегардад.
Барраи ҷингила то хушк шавад дар хуршед,
Ғарқа дар хуни худ аз пӯст ҷудо мегардад.
Одамизод чу хуршеди ҷаҳонпаймое
Ҳар қадар пеш равад, боз қафо мегардад.
Оҳи мо гар ҷигари чарх шикофид, чӣ суд?
Чӣ садоҳо ки фаромӯши фазо мегардад.
Бо вуҷуди ҳама ин то ба абад гардон бод,
Осиёе, ки пас аз навбати мо мегардад. [1979]
|
Карта сайта
