Корпус Лоика Шерали
1941 - 2000

* * *

Умр аз пеши дарам мегузарад,
Ё ки аз пешу барам мегузарад.

Аз чӣ роҳе ба чӣ ранге бошад,
Навбати умри сарам мегузарад.

Тирамоҳ ояд агар хок ба сар,
Доғи ишқ аз ҷигарам мегузарад.

Таби сӯзон чу маро даргирад,
Модарам аз назарам мегузарад.

Осмон чун ба сарам паст ояд,
Қадри дасти падарам мегузарад.

Ҳар чи дасте ба камарҳо бурдам,
Бо шикасти камарам мегузарад.

Хабари марг зи ҳар як зарабон,
Аз дили бохабарам мегузарад.

Оҳ, аз нуру сафо ҳар чӣ, ки буд,
Мисли нури басарам мегузарад...