|
* * * Бадбахт одаме, ки надорад нишони худ,
Бо ақл барнамекашад суду зиёни худ.
Бебаҳра ошиқе, ки ниҳон оҳ мекашад,
Рози ҷаҳон намекунад рози ниҳони худ.
Сарсахт дилбаре, ки худорой будааст,
Н-ороста зи ишқи дилоро равони худ.
Эй ҳайфи он ҷавон, ки кашокаш шиори ӯст,
Беҳуда ҳайф мекунад умри ҷавони худ.
Эй сад дареғи қодире, к-ӯ бо заифакон,
Лофу газоф мекунад аз бозувони худ.
Афсӯси шоире, ки ҷаҳонро надидааст,
Маҳбуси хеш мондааст андар ҷаҳони худ.
Эй вои тоҷике, ки фаромӯш кардааст,
Асли худу забони худу ҳамзабони худ... [1986]
|
Карта сайта
