Корпус Лоика Шерали
1941 - 2000

* * *

Эй раҳгузар, саломе, мо низ раҳсипорем,
Ин раҳ, ки ту сипардӣ, мо низ месипорем.

Гар ғамшарики моӣ, мо низ ғамшарикем,
Гар ту ғаме надорӣ, мо низ ғам надорем.

Ин раҳ, ки ту равонӣ, қурбон кунад ҷавонӣ,
Ҷони ҷавонӣ дар каф мо низ ҷоннисорем.

Ин роҳ то куҷоҳост? Аз дил ба сӯи дилҳост,
Анҷоми мост дарё, фарёди обшорем.

Мову ту ҳар ду танҳо дар роҳи ҷустуҷӯҳо,
Бо ҳар кӣ садди раҳ шуд, ин панди кӯҳна орем:

Беҳуда зӯр кам зан, то нашканад миёнат,
Мо як танем, аммо бо халқ бешуморем!